الحق له ناسه / حسام بخيت
الحق له ناسه
فِضِل الولد يكتب فى كراسه
تاريخنا بالهجري جنب الميلادي
كانت السنة دي
حرها ف يوليو
معرفش إيه جايلو
يرسم ف قوس النصر
و الصبح زي الأمس
تعريشة بغدادي
تقعد عليها الشمس
من أولى إعدادي
و الصحبة قبل الدار
متونسة بالجار
و الحب وهم و فار
من طلته قصادي
يا حبيبتي ليه تهتي
فى عيون محبينك
و ليه زمان القهر
مكتوب على جبينِك
تاكلي فى ورق الشجر
يطلع فى ميتينِك
و الصبر له ناسه
موال يعيد موال
ده الصبر فى أساسه
غرزة ورا غرزا
و خيط فى إيد نوَّال
بِعني غيطان القمح
و الشونة و الغَلّة
عشان أمير القصر
يلعب و يتسلّى
و يهز لي ف راسه
مين ده اللي كان ساسه
شهبندر التجار
ده الحق له ناسه
و العدل له ناسه
و الحكم له ناسه
و الخيبة للشطَّآر.
حسام بخيت
تعليقات
إرسال تعليق