ٱخر مشهد
آخر مشهد
عاطف كبارة
"""""""""""""""
المرة دي غير كل مرة
زي ماتكون دي نهايتنا
قولي آخر كلمة مرة
ف آخر مشهد بروايتنا
إكتمي دموعك جواكي
قومي يلا وودعيني
وإرسمي ف لمعة عنيكي
بسمة وإنتي بتقتليني
بس ماتبصيش وراكي
لما تمشي وتسيبيني
بعد ما نزل الستار
وإتكتب تتر النهاية
سقفوا يا ناس بإنبهار
قولوا روعة قولوا غاية
قولوا عني واد شجاع
ساب حبيبته لمصلحتها
وهي برضه بإقتناع
فضلت تنصر عيلتها
بكره تحكوا للعيال
كل يوم حدوتة عنا
وإضربوا بينا المثال
شوفوا ضحوا إزاي بجنة
ست الحسن والجمال
مرة حبت واد فقير
حب يوزن كوم جبال
خدها منه إبن الأمير
بقينا حكاية م الحكايات
بصوت أبطالها والصورة
على التترات
زي عشق قيس وليلي
روميو إنتحرمع جولييت
حروب عنتر عشان عبله
وإنتي وأنا بقينا حواديت
أنا راحل ومش عايز
أكون مشهور
وإيه حيفيدني م الشهرة
وأنا مغلوب
وتبقى نهايتي ف حكايتي
ذليل مكسور
تغور العيشة ف الأرض اللي تأذي قلوب
٢٠٠ شجرة كتبت عليها
حروف إسمك
وحاكتب تاني لو مليون
أأقرب منها وأحضنها
أشوف صورتك
تكلمني وأكلمها
بقيت مجنون
وقالوا عليا مجزوبك
وسموني من المجانين
لإني خلاص مع غيابك
زهدت العيشة والعايشين
ومش محتاج من الدنيا
غير المية ونص رغيف
لوحدي باعيش بلاد تانية
بانام ف جنينة ولا رصيف
بقيت واحد من الدراويش
أكون عايش وأنا ميت
أكون ميت وشكلي باعيش
ما يهمنيش
عارفة إيه بيألمني
أقولك شيء بيقتلني
حدودي ف الخيال حرة
وباحلم إننا ف بيتنا
ولما صحيت من حلمي
مالقتكيش
المرة دي غير كل مرة
زي ماتكون دي نهايتنا
عاطف كبارة
تعليقات
إرسال تعليق