واقف عم أتأمل الإعلان الكبير اللي بالشارع / علي حسين

واقف عم أتأمل الاعلان الكبير اللي بالشارع و اللي مكتوب عليه بالخط العريض : 

البلد بلدك .. 

دمعت عيني و انا عم اقراها بصوت عبدالرحمن ال رشي او بصوت منى واصف .. 

اديش هالجملة عميقة و مؤثرة ..؟

اديش فيها معاني و ابعاد و مفردات مبطنة ؟

جملة رائعة .. قوية و حنونة ..

يا اخي فعلا اللي اخترع هالاعلان واحد وطني بامتياز ...

مر بجنبي رجال كبير بالعمر معه كيس بندورة و بطاطا ...

قال لي : اشبك عم تطلع ع الاعلان ..

و كأنك عم تشوف شي شغلة عظيمة ..؟

قلت له : شايف هالاعلان يا عمو .. 

كلمتين متل بعض بتخليك تحس ان البلد بحاجتك ..

البلد بلدك ...

ضحك الرجال الكبير و قال لي : 

لما بتروح على شي محل و بتشتري منه اغراض و بيخورفك و بيلطك بالاسعار ،.

 شو بيقول لك بالاخير ؟ 

فكرت و فكرت و قلت له : 

المحل محلك ...

قال لي الرجال : يا عيني عليك .. 

وجملة البلد بلدك نفس الشي تماما ...

شلون بدهم يسترزقوا اذا رحت و سافرت ؟ .. 

انت زبون مهم .. 

فالموضوع موضوع تجارة و التجارة بدها زبونات ..

و الزبونات هم نحن 

قلت له : ايوااااا .. مزبوط .. 

دخلك بكم اشتريت البطاطا و البندورة ؟

قال لي : بندورة بـ ١١٠٠٠ و البطاطا بـ ١٢٠٠٠ ...

و ١٠٠ السلامة و المحل محلك ...